«Рвезе йÿк» лÿман йÿкан пырдыжгазет

«Рвезе йÿк» лÿман йÿкан пырдыжгазет

Тунемше:

Школем

Школем волгыдо да сай

Тыште илышна оҥай.

Кажне кечын, куанен.

Шочмо школышкем вашкем.

Парт коклашке шинчына,

Шинчымашым нöлтена.

Моло семынак мыят

Тунемаш шонем сайрак.

Лишемеш урок мучашке,

Мöҥгö мый каяш ом вашке.

Вет кружок вуча мемнам.

Тыште огына лий уна.

Настя Иванова

1 вÿдышö: Поро кече лийже, пагалыме уна-влак!

2 вÿдышö: Поро кече, туныктышо ден тунемше-влак!

1вÿдышö: Таче ме тендам «Рвезе йÿк» лÿман йÿкан пырдыжгазетым лудаш, ончаш, колышташ да аклаш ÿжына.

2вÿдышö: 2014 ийыште теле тылзыште кокымшо гана лекше йÿкан пырдыжгазетым шерын лекташ Карай кыдалаш школын юнкоржо-влак ямде улыт.

1 вÿдышö

Тÿрлö класс гыч улына, тÿрлö нерген шонена.

Шонымынам ош кагазыш куаналын возена.

А ушна статьям, заметкым шочыкта.

Пырдыжгазет таче тидым ончыкта.

1 лаштык

1 йоча: Шочмо йылме – эн уста, эн ушан, эн ныжылге туныктышо.

2 йоча: Шочмо йылме сöрал гына огыл, эн йöратыме йылмына, вет тудо нимо дечат раш, нимо дечат куштылго. Лач шочмо йылме дене уло шÿм-чоным почын мутланаш, палыдымым, ум вашкерак умылаш лиеш.

3 йоча: Кеч-могай пашаште тÿрлö калыкын шке йылмыжым эскерен, тÿзатен шогаш тÿҥалына гын, шкенан йылмынам öрдыжкö шÿкал огына шу гын, кеч-могай пашанат сайын каяш тÿҥалеш.

4 йоча: Марий йылме муро гай шыма, калыкын кумылжо гай лывырге.

1 вÿдышö: Теве тыгайрак ныжыл да калык ушеш кодшо шомакым шке шочмо йылмышт нерген ойленыт мемнан лÿмлö еҥна-влак.

2 вÿдышö: А ме тендан дене айста колышт ончена, мо нерген возат Карай школын юнкоржо-влак.

1 вÿдышö: Куан илышыш корно-

Шочмо йылме – тÿҥ урем.

Ангелина Соколова, 10 класс

Мый марий улам. Тидын дене кугешнем. Кузе моло калыклан корно чыла вере почылтын, тыгак марий йочанат ончылныжо кумда корно шуйналтын. Ӱшанем, тиде корно пиалан, волгыдо, яндар лиеш. Тыгай ÿшаным мыланна школышто туныктышо-влак пуэн шогат, тыгай ÿшаным мыланна кöргö чонна пуа. Тугеже ончыклык илышыш лÿдде, вожылде каяш ямде улына…

Ольга Цандекова, 6 класс

Шочмо йылме! Кушеч тудо тÿҥалеш? Мыняр ийым темымеке, шочмо йылмым сайынрак палаш тÿҥалат? Мутат уке, шочмо йылме ава шöр дене пырля толеш. Арам огыл ме шке аванам йöратена. А шочмо йылме эре пеленна лиеш…

Света Цандекова, 8 класс

Шочмо йылмына мемнан эн сöрал, эн поян. Тÿрлö йылме-влак кокла гыч ме шке шочмо йылмынам утларак йöратена, утларак тунемына. Вет шочмо йылме кеч-могай йылмым тунемаш тÿҥалтышым ышта…

Наташа Поликарпова, 10 класс

Айдеме кеч-могай мÿндыр мландыште илыже, кеч-могай кундем тудлан сöрал лийже, шочмо йылме ден шочмо мландыжым нимо денат огеш вашталте. Марла мутланен колтетат, чонетлан ласка, куштылго. Арам огыл шочмо йылме нерген шуко почеламут, калыкмут да муро шочын. Чылажат мемнам шке йылмынам йöраташ, аралаш ÿжеш. Меат, тунемше-влак, шке шочмо йылмынам сайын тунемме дене, шуко пален налаш тыршыме дене арален коден кертына…

Полина Захарова, 6 класс

Мый Марий Элыште илем. Марий кундемыштына тÿрлö калык ила. Кажныже шке йылмыж дене кугешна, шонем. Кузе от кугешне, вет шочмо йылмына мемнам йолÿмбаке шогалта. Лач шочмо йылмым сайын пален гына ушан, чолга, лÿддымö лият. Тугеже йылмына эре илыже, калыкна кужу ÿмыран лийже.

2 лаштык

1 вÿдышö: Йоча поэзий корныш лекте…

2 вÿдышö:

Поэзий шорынан йолгорно,

Шÿмна гыч тиде ошкыл тÿҥалеш.

Поэзий — тиде илыш корно,

Тасмала почешет шуйналт кодеш. (Н.Ильина)

1вÿдышö: Теве тыгерак «Поэзий корно» лÿман почеламутыштыжо мемнан туныктышына Надежда Дмитриевна воза.

2 вÿдышö: Вара мо нерген возат шочмо йылмым да литературым йöратыше юнкор-влак? Айста колышт ончена!

(Йоча-влак шке возымо почеламутыштым, тыгак ончычсо тунемше-влакын возымыштым наизусть тунемыт да ойлат. Возымо материал-влак пырдыжгазетеш сöрастарыме.)

1-ше лудшо

Шулдыраҥын чоҥештем

Ончылнем шуйналтын кужу корно

Шöрын ма, тура ма кö пала?

Юмын пÿрымыж деч кораҥаш ом шоно,

Поро шонымаш дене чонем шÿла….

Кеч-мом ойлышт шучко йылман еҥ-влак,

Нуным колышташ вет нимолан.

Ӱшанем яндар ура чонемлан.

Шулдыраҥын чоҥештем садлан. (Марина Соколова)

2-шо лудшо

Кече гай аваем

Кече гай аваем,

Ырыктет шÿм-чонем.

Могай поро улат,

Мыланем тый кÿлат… (Алена Ильина)

3-шо лудшо

Шочмо ялем

Шергакан изи ялем

Пешак тыйым йöратем.

Мÿндыркö каем гынат,

Шинчамлан эре коят.

А ялем воктен шийла,

Йылгыжын, эҥер йога.

Вÿдшö яндар эреак

Лиеш подыл ончашат… (Марина Иванова)

1 вÿдышö: Ныжылгын возымо почеламутлан сем шкеак шочеш. Тыгай почеламутым йоча-влак куанен возат, а нунын возымо почеламутыштлан семат шочын.

2 вÿдышö

Муралташ шонет гын, муро

Сем шомак кÿлеш тидлан.

Кажне еҥын чоныш пуро

Вер ынже лий йокроклан. (Н.Ильина)

2 вÿдышö: Тендан ончыко 6 классын тунемшыже-влак вашкат. Нуно Оксана Ильинан возымо «Шочмо верем» почеламутшылан мурым йоҥгалтарат. Почеламутлан семым Вячеслав Осипов возен. (Пырдыжгазетыште тиде мурын историйже нерген возымо.)

«Шочмо верем» муро йонга. Мутшо О.Ильинан, семже В.Осиповын.

3 лаштык

1 вÿдышö: Йомак тÿняшке унала.

2 вÿдышö:

Йомак тÿняшке унала

Юнкор-влак ÿжыт кажныдам.

Пеш йöратат возаш марла.

Ончалза, шкеак ужыда. (Н.Ильина)

1 вÿдышö: Юнкор-влакын возымо пашаштым «Йомак тÿня» лÿман посна книга дене чумырымо да сÿрет дене келыштарыме. Нине почеламут-влакым «Кече» журнал ден «Ямде лий» газетышке колташ темлыме.

2 вÿдышö: Йомак возымаште Ангелина Соколова, Мария Медведева, Наталья Поликарпова, Настя Иванова, Света Цандекова, Кристина Ефимова, Дмитрий Соколов ойыртемалтыт. Нунын пашаштым чÿчкыдынак районысо «Юл увер», республикысе «Ямде лий», «Марий Эл» газетлаште ужаш лиеш. Йомак гыч ужаш-влакым изирак класслаште тунемше-влак модын ончыктат.

(Юнкор-влакын йомакыштым сÿрет дене келыштарен пырдыжгазетеш верандыме. Йоча-влак йомакым модын ончыктат.)